ჟურნალისტი დათო გამცემლიძე „ნამახვანჰესის“ პროექტის ჩაშლასა და ENKA-სთან საარბიტრაჟო დავის შედეგს მწვავედ ეხმაურება და პასუხისმგებლობას მაშინდელ ხელისუფლებას აკისრებს.
„450 მილიონიანი ჯარიმა ცალკე და ენგურჰესთან შესადარი სიმძლავრის გენერაცია კიდევ ცალკე, რაც აფხაზეთის პრობლემის რეგულირებისთვის უმძლავრესი ბერკეტი გახდებოდა“, — წერს გამცემლიძე.
მისი შეფასებით, სახელმწიფომ პროექტის შეჩერებით არა მხოლოდ დიდი ფინანსური ზარალი მიიღო, არამედ დაკარგა მნიშვნელოვანი ენერგეტიკული პროექტიც. გამცემლიძე განსაკუთრებით აკრიტიკებს „ნამახვანჰესის“ წინააღმდეგ პროტესტს და მის ერთ-ერთ ლიდერს, ვარლამ გოლეთიანს.
„კონტრაქტს ხელი აწ უკვე სადღაც ტრაკში გამშპარ-აორთქლებულმა მამუკა ბახტაძემ მოაწერა და ირაკლი ღარიბაშვილმა ჩასვარა. ამ უკანასკნელს ვარლამმა „დაუცაცხანა“ და სუნი აუვიდა“, — წერს გამცემლიძე.
პოსტს ავტორი რიტორიკული კითხვით ასრულებს — „გვეშველება?“
აშშ-ის კოლუმბიის ოლქის ფედერალურმა სასამართლომ 11 სექტემბერს არ დააკმაყოფილა საქართველოს მოთხოვნა ENKA-ს სასარგებლოდ გამოტანილი საარბიტრაჟო გადაწყვეტილების აღსრულების შეჩერებაზე და ENKA-ს შუამდგომლობა დააკმაყოფილა. სასამართლოს დოკუმენტის მიხედვით, საარბიტრაჟო ტრიბუნალის მიერ განსაზღვრული ძირითადი თანხა დაახლოებით 350 მილიონი დოლარია, რომელსაც SOFR+4%-იანი პროცენტი ერიცხება; ENKA-მ სასამართლოს 18 სექტემბრამდე უნდა წარუდგინოს საბოლოო თანხის, დარიცხული პროცენტის ჩათვლით, პროექტი.
