შინაგან საქმეთა სამინისტრო ძმების, დავით და გიორგი ფეიქრიშვილების, ასევე კიდევ ერთი პირის დაკავების შესახებ ინფორმაციას ავრცელებს. უწყების ცნობით, სამი პირი ორ სხვადასხვა სისხლის სამართლის საქმეზე, გამოძალვისა და ჯგუფურად ჩადენილი ძალადობის ბრალდებით დააკავეს.
სამინისტროს ინფორმაციით, გამოძიებით დადგინდა, რომ გიორგი ფეიქრიშვილმა მოქალაქე თბილისში მდებარე საცხოვრებელ სახლში მიიყვანა და ე.წ. კრიმინალური მფარველობის სანაცვლოდ დიდი ოდენობით თანხის გადახდა მოსთხოვა. უწყების განცხადებით, თანხის გადაუხდელობის შემთხვევაში ის მოქალაქეს სიცოცხლის მოსპობით დაემუქრა. სამართალდამცველებმა გიორგი ფეიქრიშვილი თბილისში დააკავეს.
რაც შეეხება მეორე სისხლის სამართლის საქმეს, შსს-ს ცნობით, თბილისში, ურთიერთშელაპარაკების ნიადაგზე, დავით ფეიქრიშვილმა და მისმა პირადმა დაცვამ ახალგაზრდა მამაკაცზე ჯგუფურად იძალადეს. პოლიციამ ორივე მათგანი დააკავა.
„შინაგან საქმეთა სამინისტროს თბილისის პოლიციის დეპარტამენტის თანამშრომლებმა, ორ სხვადასხვა სისხლის სამართლის საქმეზე ჩატარებული ოპერატიული ღონისძიებებისა და საგამოძიებო მოქმედებების შედეგად, ჯგუფურად ჩადენილი ძალადობისა და გამოძალვის ბრალდებით სამი პირი, წარსულში მრავალჯერ ნასამართლევი 1986 წელს დაბადებული ძმები, გიორგი და დავით ფეიქრიშვილები, ასევე 1983 წელს დაბადებული კიდევ ერთი პირი დააკავეს“, - ნათქვამია სამინისტროს განცხადებაში.
უწყების ინფორმაციით, გამოძიება საქართველოს სისხლის სამართლის კოდექსის 181-ე და 126-ე მუხლებით მიმდინარეობს, რაც, შესაბამისად, გამოძალვასა და ძალადობას გულისხმობს.
