თბილისში ნოროვირუსის შემთხვევების გამოვლენის შემდეგ დედაქალაქის საბავშვო ბაგა-ბაღებში რისკების მართვის დროებითი პროტოკოლი ამოქმედდა. თბილისის ბაგა-ბაღების მართვის სააგენტოს ინფორმაციით, გატარებული ღონისძიებები ეპიდემიოლოგების რეკომენდაციებს ეფუძნება.
სააგენტოს ცნობით, ყველა საბავშვო ბაღში ჩატარდა სადეზინფექციო სამუშაოები, გამკაცრდა სანიტარულ-ჰიგიენური რეჟიმი და მის დაცვაზე კონტროლი. ზედაპირები და შიდა სივრცეები ორ საათში ერთხელ სუფთავდება და დეზინფიცირდება, ხოლო ყოველი სააღმზრდელო დღის დასრულების შემდეგ ბაღების ტერიტორიაზე დამატებითი სადეზინფექციო სამუშაოები ტარდება.
„თბილისის ბაგა-ბაღების სააგენტო გადავიდა მუშაობის საგანგებო რეჟიმზე. ყველა საბავშვო ბაღში ჩატარდა სადეზინფექციო სამუშაოები. პარალელურად, გამკაცრებულია სანიტარულ-ჰიგიენური რეჟიმი და მისი კონტროლი“, - აღნიშნულია სააგენტოს განცხადებაში.
სააგენტოს ინფორმაციით, დროებითი პროტოკოლის ფარგლებში ცვლილებები შევიდა ბავშვების კვების რაციონსა და სასწავლო პროცესისთვის განკუთვნილი ინვენტარის გამოყენების წესშიც.
„შეგახსენებთ, ეს არის დროებითი ღონისძიება, რომლის დასრულებისთანავე, ბავშვები დაუბრუნდებიან ჩვეულ სააღმზრდელო პროცესს“, - აცხადებენ თბილისის ბაგა-ბაღების მართვის სააგენტოში.
სააგენტოს არ დაუკონკრეტებია, როდის დასრულდება დროებითი პროტოკოლის მოქმედება.
