უკრაინის პრეზიდენტმა ვოლოდიმირ ზელენსკიმ აშშ-ის პრეზიდენტ დონალდ ტრამპს „ლინდსი გრემის კანონპროექტის“ მხარდაჭერისთვის მადლობა გადაუხადა და იმედი გამოთქვა, რომ მისი დახმარებით რუსეთის ომის დასრულება ზამთრამდე მოხერხდება. პრეზიდენტებმა ნიუ-იორკში, გაეროს გენერალური ასამბლეის ფარგლებში დაგეგმილი შეხვედრის დაწყებამდე, ჟურნალისტებთან ისაუბრეს.
„მადლობა თქვენი პირადი მხარდაჭერისთვის და ორპარტიული მხარდაჭერისთვის, როდესაც მათ მხარი დაუჭირეს „ლინდსი გრემის კანონპროექტს“. დიდი მადლობა ამისთვის. იმედი მაქვს, ამ ომს დავასრულებთ და პრეზიდენტი ტრამპი დაგვეხმარება ამ ომის დამთავრებაში. ვფიქრობ, ეს რაც შეიძლება სწრაფად უნდა გავაკეთოთ, უმჯობესია, ზამთრამდე. ასე რომ, ბევრ სხვადასხვა საკითხს განვიხილავთ“, - განაცხადა ზელენსკიმ.
თავის მხრივ, ტრამპმა რუსეთსა და უკრაინას შორის შეთანხმების მიღწევის შესაძლებლობაზე ისაუბრა. მისი თქმით, ამ საკითხზე არაერთი საუბარი გაიმართა, მათ შორის რუსეთის პრეზიდენტ ვლადიმირ პუტინთან.
„ვფიქრობ, მათ შეთანხმებას უნდა მიაღწიონ და არ მინდა იმის თქმა, თუ რა შეთანხმებაა. ბევრი ვისაუბრეთ ამაზე, მათ შორის პრეზიდენტ პუტინთან, და ვფიქრობ, რაღაც მოხდება“, - განაცხადა ტრამპმა.
აშშ-ის პრეზიდენტმა უკრაინელების საბრძოლო შესაძლებლობებიც შეაფასა და აღნიშნა, რომ მათ საკუთარი თავით სიამაყის საფუძველი აქვთ.
„ისინი ნამდვილად კარგი მებრძოლები არიან. შეუძლიათ საკუთარი თავით იამაყონ, იმის მიუხედავად, თუ რა მოხდება. ძალიან დიდი შესაძლებლობების მქონე ხალხია, დიდი შესაძლებლობების ხელმძღვანელობაა“, - თქვა ტრამპმა.
ჟურნალისტებთან საუბრისას ტრამპი რუსეთის ენერგეტიკულ ობიექტებზე უკრაინის დარტყმებსაც შეეხო. მისი შეფასებით, ამ თავდასხმებმა რუსეთს სერიოზული ზიანი მიაყენა და დიზელის საწვავის ფასის ზრდაზეც იმოქმედა.
„ეს დიდი დარტყმაა რუსებისთვის. ეს ასევე დიდი დარტყმაა დიზელის საწვავის ფასზე. მისი ფასი საკმაოდ გაიზარდა. ვისაუბრებთ ამაზე, მაგრამ ეს ძალიან სერიოზული დარტყმაა რუსეთისთვის, უდავოდ“, - განაცხადა აშშ-ის პრეზიდენტმა.
