როგორც ფილაურმა „ინტერპრესნიუსს“ განუცხადა, ჟურნალისტს ბრალდება ოფიციალურად გუშინ, დროებითი მოთავსების იზოლატორში წარუდგინეს.
„ღალატისა და საბოტაჟის მუხლით წაუყენეს ბრალი. რა თქმა უნდა, ბრალს არ ვეთანხმებით. დიტო ჩუბინიძე კატეგორიულად უარყოფს, რომ ის რამეში დამნაშავეა. ის მოქმედებდა, როგორც ჟურნალისტი და იღებდა ინფორმაციას, რასაც აშუქებდა. მისი პოზიცია ასეთია – ის მზად არის ბრძოლისათვის“, – განაცხადა ადვოკატმა.
ფილაურმა ასევე ისაუბრა ყოფილი პრემიერ-მინისტრის, ირაკლი ღარიბაშვილის წერილში ჩუბინიძის ხსენებასა და იმ ვარაუდებზე, რომლებიც ჟურნალისტის დაკავებას აღნიშნულ გარემოებას უკავშირებს.
ადვოკატის თქმით, მან ეს საკითხი უშუალოდ ჩუბინიძესთან გაარკვია, თუმცა ჟურნალისტმა ღარიბაშვილთან რაიმე პირადი კავშირი ან კომუნიკაცია უარყო.
„ეს კითხვა მეც გამიჩნდა და დავუსვი. ის იცნობს ირაკლი ღარიბაშვილის გამოქვეყნებულ მასალებს. ვკითხე, ხომ არ იცნობს მას პირადად, ხომ არ ჰქონია მასთან კომუნიკაცია, რაზეც მიპასუხა, რომ საერთოდ არ ვიცნობ, როგორც ყოფილ პოლიტიკოსს, ისე ვიცნობ, სატელეფონო კომუნიკაციაც კი არასდროს მქონია მასთანო“, – განაცხადა ფილაურმა.
მისივე თქმით, ჩუბინიძე გაკვირვებულია, რომ მისი დაკავება ყოფილი პრემიერ-მინისტრის სახელს დაუკავშირეს.
„მან უფრო ვერ დააკავშირა ეს დაკავება მასთან. საზოგადოებას გაუჩნდა ეს კითხვა, მათ შორის მეც და ლოგიკური იყო, ეს კითხვა დამესვა“, – აღნიშნა ადვოკატმა.
შეგახსენებთ, გენერალურმა პროკურატურამ „ასავალ-დასავალის“ ჟურნალისტი დიტო ჩუბინიძე სამშობლოს ღალატის, კერძოდ საბოტაჟის ბრალდებით დააკავა.
საგამოძიებო უწყების მტკიცებით, 2026 წლის თებერვლიდან ჩუბინიძე სხვადასხვა მედიასაშუალებისა და სოციალური პლატფორმის გამოყენებით სისტემატურად ავრცელებდა ცრუ და დეზინფორმაციულ ცნობებს.
პროკურატურა ჟურნალისტს, მათ შორის, დავითგარეჯის საკითხთან დაკავშირებით გავრცელებულ ინფორმაციას ედავება. ბრალდების მხარის ვერსიით, ჩუბინიძე ავრცელებდა ცნობებს, თითქოს საქართველოს ხელისუფლებამ დავითგარეჯის სამონასტრო კომპლექსის ნაწილი ფარულად გადასცა აზერბაიჯანს.
დიტო ჩუბინიძის დაცვის მხარე ბრალდებას არ ეთანხმება და აცხადებს, რომ მისი მოქმედებები ჟურნალისტური საქმიანობის ფარგლებში ექცეოდა. საქმეზე სასამართლოს საბოლოო გადაწყვეტილება მიღებული არ არის.
