„ომის დაწყება ძალიან ადვილია, მაგრამ მისი დასრულება ძალიან რთული, ისევე როგორც გამარჯვების მოპოვება. ამიტომ, ვფიქრობ, აზერბაიჯანის გამოცდილება უნდა შეისწავლონ მათ, ვინც დღეს ომებშია ჩართული“, – განაცხადა ალიევმა.
აზერბაიჯანის პრეზიდენტმა ყარაბაღის კონფლიქტზე საუბრისას აღნიშნა, რომ მისმა ქვეყანამ სამხედრო გამარჯვების შემდეგ საბრძოლო მოქმედებები შეწყვიტა და სომხეთს მშვიდობა შესთავაზა.
„ჩვენ ომი მოვიგეთ და ეს სამართლიანი ომი იყო. დამარცხებული მხარე კაპიტულაციაზე წავიდა, ჩვენ კი ამის შემდეგ წინ აღარ წავსულვართ – დროულად შევჩერდით და მშვიდობა შევთავაზეთ“, – განაცხადა მან.
ალიევმა ყურადღება გაამახვილა საერთაშორისო ორგანიზაციების გადაწყვეტილებების აღსრულების პრობლემაზეც და აღნიშნა, რომ საერთაშორისო სამართლის ეფექტიანობისთვის აუცილებელია შესაბამისი მექანიზმების შექმნა.
მისი თქმით, გაეროს რეფორმირების საკითხზე მიმდინარე დისკუსიების ერთ-ერთი მთავარი მიმართულება სწორედ საერთაშორისო გადაწყვეტილებების შესრულების უზრუნველყოფა უნდა იყოს.
„აუცილებელია გადაწყვეტილებების, მათ შორის გაეროს უშიშროების საბჭოს რეზოლუციების აღსრულების მექანიზმი. ჩვენ 30 წლის განმავლობაში ვიყავით მსგავს ვითარებაში. გაეროს უშიშროების საბჭომ მიიღო ოთხი რეზოლუცია, რომლებიც აზერბაიჯანული მიწების გათავისუფლებას მოითხოვდა. თუმცა, ეს რეზოლუციები არ შესრულებულა“, – აღნიშნა აზერბაიჯანის პრეზიდენტმა.
ალიევის განცხადებით, საერთაშორისო თანამეგობრობამ სომხეთის წინააღმდეგ სანქციები არ დააწესა, მაშინ როდესაც სხვა ქვეყნების მიმართ მსგავსი შეზღუდვები ფართოდ გამოიყენება. მან ეს გარემოება საერთაშორისო პოლიტიკაში ორმაგი სტანდარტების გამოვლინებად შეაფასა.
„აზერბაიჯანის ჩრდილოეთით და სამხრეთით თუ გაიხედავთ, დაინახავთ, რომ ასობით სანქციაა დაწესებული. სომხეთის წინააღმდეგ კი სანქციები არ დაწესებულა. ეს სხვა არაფერია, თუ არა ორმაგი სტანდარტები“, – განაცხადა ალიევმა.
მისი თქმით, ორმაგ სტანდარტებთან ბრძოლა აზერბაიჯანის საგარეო პოლიტიკის ერთ-ერთ მნიშვნელოვან მიმართულებად დარჩება.
„ჩვენ ყოველთვის ვიბრძოდით პოლიტიკაში ორმაგი სტანდარტების წინააღმდეგ და ამ ბრძოლას მომავალშიც გავაგრძელებთ, რადგან თავადაც დავზარალდით ორმაგი სტანდარტების გამო და დღესაც ვგრძნობთ მათ გავლენას“, – აღნიშნა აზერბაიჯანის პრეზიდენტმა.
წყარო: Trend.az
