სახალხო დამცველის აპარატი აღნიშნულ ინფორმაციას გიორგი ფეიქრიშვილის მიმართ სავარაუდო არასათანადო მოპყრობის შესახებ გავრცელებული ცნობების საპასუხოდ ავრცელებს.
უწყების განმარტებით, 25 ოქტომბერს სახალხო დამცველის აპარატის ცხელ ხაზზე შევიდა შეტყობინება №8 პენიტენციურ დაწესებულებაში ფეიქრიშვილის მიმართ სავარაუდო არასათანადო მოპყრობის შესახებ. შეტყობინების ავტორი ბრალდებულის მონახულებას ითხოვდა.
„მიღებული შეტყობინების საფუძველზე, სახალხო დამცველის რწმუნებულმა №8 პენიტენციურ დაწესებულებაში პირადად მოინახულა გიორგი ფეიქრიშვილი. ბრალდებულის განმარტებით, იგი საკანში მარტო იმყოფება და მასთან ერთად სხვა პატიმრები არ არიან განთავსებული. ამასთან, მისი განცხადებით, ამ ეტაპზე უსაფრთხოების საკითხებთან დაკავშირებით პრეტენზიები არ აქვს“, – ნათქვამია განცხადებაში.
სახალხო დამცველის აპარატის ინფორმაციით, მონახულებისას გიორგი ფეიქრიშვილს უწყების მიმართ დამატებითი მოთხოვნები არ დაუფიქსირებია.
შეგახსენებთ, მანამდე ძმები ფეიქრიშვილების დედამ, ნინო აბრამიშვილმა გაავრცელა ინფორმაცია, რომლის თანახმადაც, ე.წ. კრიმინალური ავტორიტეტი ვატო ყიფიანი ამჯერად მისი მეორე შვილის, გიორგი ფეიქრიშვილის საკანში შევიდა.
აღნიშნული ინფორმაცია სპეციალურმა პენიტენციურმა სამსახურმა უარყო.
სახალხო დამცველის აპარატის განცხადებაში საუბარია გიორგი ფეიქრიშვილის მონახულების მომენტში არსებულ მდგომარეობასა და მის მიერ დაფიქსირებულ პოზიციაზე. უწყება არ ავრცელებს დამატებით ინფორმაციას იმის შესახებ, დადასტურდა თუ არა წარსულში სავარაუდო არასათანადო მოპყრობის შესახებ გავრცელებული ცნობები.
