უკრაინის პრეზიდენტის, ვოლოდიმირ ზელენსკის განცხადებით, უკრაინა შესაძლო სამშვიდობო შეთანხმების ფარგლებში არ დათანხმდება არც შეიარაღებული ძალების რიცხოვნობის შეზღუდვას და არც ნეიტრალური სტატუსის მიღებას.
„ჩვენ არ შეგვიძლია ვისაუბროთ ჩვენი სახელმწიფოს ნეიტრალიტეტზე და არც უნდა ვისაუბროთ. ჩვენი ხედვა, პრინციპში, ემთხვევა ამერიკულს. ასევე, არ შეგვიძლია ვისაუბროთ უკრაინული არმიის შეზღუდვაზე“, – განაცხადა ზელენსკიმ.
მისი თქმით, უკრაინის უსაფრთხოების გარანტიების პირობებს რუსეთი ვერ განსაზღვრავს.
„ჩვენი არმიის შეზღუდვისა და უკრაინის ნეიტრალიტეტის საკითხები განხილვას არ ექვემდებარება. ტერიტორიული საკითხი კი წითელი ხაზია, რომლის განხილვაც მხოლოდ ლიდერების დონეზე შეიძლება“, – აღნიშნა უკრაინის პრეზიდენტმა.
წყარო: Українська правда
